नेवासा
: तालुक्यातील खेडले काजळी येथील शेतकरी संदीप महादेव ढगे यांनी शेताच्या हद्दीवरील जुना बांध तसेच सरकारी सीमाखुणा जेसीबीच्या साहाय्याने नष्ट केल्याप्रकरणी तहसील प्रशासनाने दंडात्मक कारवाई केली आहे.
मिळालेल्या माहितीनुसार, संदीप ढगे यांनी वडिलोपार्जित निश्चित केलेल्या शेतबांधावरील सरकारी खुणा हटवून बांध उद्ध्वस्त केला. यावेळी बांधावर असलेली तीन लिंबाची झाडेदेखील जेसीबीने तोडण्यात आली. या प्रकाराची दखल घेत नेवासा तहसीलदार तथा दंडाधिकारी यांनी संबंधितांवर कारवाईचा बडगा उगारला.
सदर प्रकरणात सात दिवसांच्या आत दंडाची रक्कम जमा करण्याचे आदेश देण्यात आले असून, मुदतीत रक्कम न भरल्यास पुढील कायदेशीर कारवाई करण्यात येणार असल्याचे प्रशासनाकडून स्पष्ट करण्यात आले.
दरम्यान, शेतकरी बांधवांनी परस्पर सहकार्य, सलोखा आणि प्रेमाने राहून वाद टाळावेत, असा गर्भित संदेश तहसील प्रशासनाने या कारवाईतून दिल्याची चर्चा परिसरात सुरू आहे.
