उत्स्फूर्त आवक आणि उत्साही दर
नेवासा (प्रतिनिधी) – कृषी उत्पन्न बाजार समिती, नेवासा यांनी शेतकऱ्यांच्या सोयीसाठी रविवारच्या दिवशीही कांदा खरेदी-विक्री उपक्रम सुरू केला असून या उपक्रमाला पहिल्याच दिवशी उत्स्फूर्त प्रतिसाद मिळाला. रविवारी झालेल्या कांदा लिलावासाठी सुमारे १०० वाहनांमधून कांद्याची आवक झाली.
बाजार समितीचे सभापती नंदकुमार पाटील यांनी सांगितले की, शेतकऱ्यांना अधिक सोयीस्कर बाजारपेठ उपलब्ध करून देण्याच्या उद्देशाने रविवारच्या दिवशीही कांदा खरेदी-विक्री सुरू करण्यात आली आहे. या उपक्रमाला मिळालेला प्रतिसाद समाधानकारक असून खुल्या कांदा विक्री केंद्र परिसरातील शेतकऱ्यांनी दाखविलेल्या सहभागाबद्दल त्यांनी आभार व्यक्त केले.
दि. १४ जून २०२६ रोजी झालेल्या लिलावात कांद्याला प्रतिक्विंटल किमान २०० रुपये, कमाल १५०० रुपये तर सरासरी ८०० ते १००० रुपये असा भाव मिळाला. बाजार समितीने शेतकरी बांधवांना बाजारभावांचा अभ्यास करूनच माल विक्रीस आणण्याचे आवाहन केले आहे.
