डंपर चालक फरार वाळू तस्करांमध्ये खळबळ
नेवासा (प्रतिनिधी) : प्रवरा नदीपात्रातून अवैधरित्या वाळू उपसा करून वाहतूक करणाऱ्या डंपरवर नेवासा पोलिसांनी कारवाई करत सुमारे ९ लाख १६ हजार रुपयांचा मुद्देमाल जप्त केला. मात्र, डंपर चालक पोलिसांच्या ताब्यातून निसटून फरार झाला.
पोलिसांनी दिलेल्या माहितीनुसार, डायल ११२ पथक रात्रगस्त करत असताना गुप्त माहितीच्या आधारे चिंचबन रोडलगत प्रवरा नदीपात्र परिसरात छापा टाकण्यात आला. पहाटेच्या सुमारास नदीपात्रातून बाहेर येणारा एक डंपर अडविण्यात आला. चालकाने आपले नाव काळू शिवाजी आळपे (वय ३५, रा. गंगानगर, नेवासा खुर्द) असे सांगितले. चौकशीदरम्यान त्याच्याकडे वाळू वाहतुकीचा कोणताही वैध परवाना नसल्याचे समोर आले.
पोलिसांनी चालकाला ताब्यात घेण्याचा प्रयत्न केला असता त्याने हाताला हिसका देऊन अंधाराचा फायदा घेत घटनास्थळावरून पलायन केले. त्याचा शोध घेण्यात आला; मात्र तो आढळून आला नाही.
या कारवाईत चार ब्रास वाळू भरलेला विनाक्रमांकाचा डंपर व वाळूसह एकूण ९ लाख १६ हजार रुपयांचा मुद्देमाल जप्त करण्यात आला. याप्रकरणी काळू शिवाजी आळपे याच्याविरुद्ध भारतीय न्याय संहिता कलम ३०३(२) तसेच पर्यावरण संरक्षण अधिनियमातील कलम ३ व १५ अन्वये नेवासा पोलीस ठाण्यात गुन्हा दाखल करण्यात आला आहे. पुढील तपास पोलीस करीत आहेत.
